Հայաստանի ազգային փոքրամասնությունների ՀԿ-ները սատարում են Տարոն Մարգարյանին
17/04/2013
Ապրիլի 17-ին կայացել է Հայաստանի ազգային փոքրամասնությունները ներկայացնող հասարակական կազմակերպությունների ղեկավարների և անդամների հանդիպումը մայիսի 5-ին կայանալիք Երևանի ավագանու ընտրություններում Հայաստանի Հանրապետական կուսակցության կենտրոնական ընտրական շտաբի ներկայացուցիչներ Արտակ Դավթյանի, Մկրտիչ Մինասյանի և Արտակ Զաքարյանի հետ:
Հայաստանի ազգային փոքրամասնությունների հասարակական կազմակերպությունները, հաշվի առնելով քաղաքապետ Տարոն Մարգարյանի պաշտոնավարման ժամանակահատվածում մայրաքաղաքում արձանագրված ձեռքբերումները, մասնավորապես՝ կանաչապատման, փողոցների ու բակերի բարեկարգման և այլ ուղղություններով, հայտարարել են, որ մայիսի 5-ին կայանալիք Երևանի ավագանու ընտրություններում կսատարեն Հայաստանի Հանրապետական կուսակցության կողմից առաջադրված Երևանի ավագանու անդամության թեկնածու, Երևանի գործող քաղաքապետ Տարոն Մարգարյանի թեկնածությունը:
Հասարակական կազմակերպությունների ներկայացուցիչներն ընդգծել են, որ Երևանի քաղաքապետ Տարոն Մարգարյանի հետ ունեցած հանդիպումները միշտ անցել են ջերմ ու փոխադարձ հարգանքի մթնոլորտում, իսկ առաջ քաշված հարցերը որպես կանոն գտել են գործնական լուծումներ:
Այնուհետ ներկաներն անդրադարձել են իրենց համայնքներին հուզող հարցերին, մասնավորապես՝ մայրենի լեզուներով պարբերականների տպագրման կամ ֆինանսավորման ավելացման, ռադիոհաղորդումների հեռարձակման հետ կապված: Բարձրացվել են նաև քաղաքային տնտեսությանն առնչվող այլ խնդիրներ, նախանշվել են լուծման տարբերակները, որոնք կփոխանցվեն Երևանի ավագանու անդամության թեկնածու, Երևանի գործող քաղաքապետ Տարոն Մարգարյանին և կքննարկվեն ապրիլի 30-ին ազգային փոքրամասնությունների հետ նախատեսված հանդիպման ժամանակ:
